Lalín é un concello para coñecer sen présas. A súa extensión territorial, a dicotomía entre o rural e o urbán e a conxugación armónica de tradición e modernidade abren tal cantidade de posibilidades para os visitantes que obrigan a desfrutar con pausa cada unha delas.

TRADICIÓN: A matanza do porco ou a malla tradicional son só dúas das múltiples tradicións que se están a recuperar e impulsar para convertelas en referentes turísticos.

MODERNIDADE: Como pobo de configuración urbanística relativamente recente, Lalín está apostando pola humanización das rúas e espazos. Proba delo son as numerosas obras escultóricas que salpican as rúas e parques da localidade.

CULTURA: Lalín, como berce dun dos precursores da nova pintura galega, o pintor Laxeiro, conta cunha completa rede museística e de espazos de exposición: o Museo Municipal Ramón María Aller, o Museo Galego da Marioneta, o Auditorio Municipal ou o Museo Etnográfico Casa do Patrón.

NATUREZA: A Serra do Candán, as incomparables carballeiras, as decenas de regueiros e ríos… ¿Vaste perder estas paisaxes?

COMERCIO: A variada oferta comercial é o complemento perfecto para desfrutar dunha estancia en Lalín, cobrando un protagonismo especial o mundo da moda e as marcas locais.

GASTRONOMÍA: Lalín é un bo lugar para comer e, sobre todo, para desfrutar comendo; é un deses pobos que cautivan ó viaxeiro polo seu padal, especialmente se proba o mellor cocido do mundo.

FEIRAS: Os días 3 e 18 de cada mes, a cita coa feira é ineludible en Lalín. Pero ademais, ó longo do ano, diferentes eventos captan a atención de milleiros de visitantes: Feiradeza, a Feira do Cabalo, a Feira do Cocido, etc.

FESTAS: Se na tempada invernal a Feira do Cocido centraliza as actividades festivas do municipio lalinense, as festas patronais na honra á Virxe das Dores poñen o broche á tempada estival na terceira semana do mes de setembro.