Lalín é un dos concellos que atravesa a ruta de peregrinaxe coñecida como Vía da Prata, que durante séculos serviu e, segue servindo, de vía de entrada de peregríns a Compostela coa fin de venerar os restos mortais do Apóstolo Santiago.

Procedentes da localidade de San Cristovo de Cea e camiño de Santiago de Compostela, os peregríns que recorren a Vía de Prata encontran en Lalín un punto ideal para repoñer forzas desfrutando dunha rica oferta gastronómica. O concello conta incluso cun lugar para pernoctar no Albergue dos Peregríns de A Laxe, na parroquia de Bendoiro, con capacidade para 29 persoas e con todos os servizos necesarios para unha estancia agradable.

Precisamente A Laxe é o lugar de confluencia entre a Vía da Prata e outro dos itinerarios xacobeos de peregrinación: o Camiño Sur ou Camiño de Inverno.

O Camiño de Inverno

Con este nome denominamos a ruta que en época invernal moitos peregríns elixían para evitar subir polas cumes nevadas do Cebreiro, desviándose do Camiño Francés en Ponferrada. O camiñante seguía a Santiago por un camiño máis fácil, de cotas máis baixas do terreo que marcaba, en gran parte do seu percorrido, o cauce do río Sil, uníndose á Ruta da Prata nas terras pontevedresas de Lalín.

Tras deixar Ponferrada, a ruta emprende unha lixeira subida cara ó parque arqueolóxico das Médulas para abandonar as terras leonesas do Bierzo e adentrarse nas galegas pola Comarca de Valdeorras, onde o camiño discorre, practicamente, paralelo ó río Sil. Seguindo éste, entra na provincia lucense, onde podemos contemplar o túnel romano de Montefurado.

A ruta continúa polas espectaculares paraxes da Ribeira Sacra lucense. Tras cruzar o río Miño por Belesar, a ruta sobe cara ó monte Faro, onde penetra nas terras pontevedresas por Rodeiro e Lalín. Aquí, no lugar de A Laxe, únese á Ruta da Prata (o viaxeiro dispón aquí dun albergue oficial de peregríns, con capacidade de 29 camas e dotado con duchas, cociña e zona de descanso).

Por diante aínda quedan medio centenar de quilómetros para pisar terras compostelás, alcanzar a Praza do Obradoiro e entrar na Catedral.