O comercio do municipio concéntrase na vila de Lalín, onde establecementos especializados cobren amplamente as necesidades dos veciños do término municipal e exercen influencia sobre os demáis concellos da comarca. Pero o éxito do comercio lalinense vai moito máis alá: ducias de persoas achéganse cada día a Lalín dende todas as comarcas de Galicia ou de camiño cara á meseta, para mercar en establecementos de moda. Esta tendencia consolidouse nos últimos anos coa apertura de varios "oulets" das fábricas de moda que teñen a súa sede na capital da comarca do Deza.

Lalín concentra a maior parte do atractivo comercial da comarca dezana, na que se enmarca. Coñecida pola súa industria textil e pola confección, conta con empresas punteiras na moda e o deseño a nivel internacional.

Na vila de Lalín, capital do concello, existen varios establecementos e centros comerciais onde poder adquirir calquera tipo de producto. Conta tamén con salas de cine, cafeterías, pubs e discotecas. O novo paseo do Pontiñas e a área de esparcemento permiten desfrutar do tempo de lecer ó mesmo tempo que se realizan compras nos diferentes establecementos comerciais, especialmente de productos cárnicos, embutidos e textil. Esta realidade sitúa á vila entre os municipios que teñen no "shopping" unha referencia desa nova forma de facer turismo en boga nos últimos anos.