A natureza é un dos elementos que fan de Lalín un lugar idóneo para percorrer e onde se pode desfrutar dun agradable período de vacacións. Os ríos, os montes e as serras fan deste concello un espazo único onde os elementos naturais conforman un escenario de ensono.

Algúns destes espazos debuxados polo devir do tempo, en ocasións coa axuda da man do home, son os seguintes:

Fraga de Catasós. Tamén coñecida como Carballeira de Quiroga. Trátase dun bosque mixto de carballos e castineiros. Os exemplares que alí se atopan están considerados os máis altos de Europa (ata 30 metros de alto).

O sendeiro que discorre entre esta fraga lévanos ó Pazo de Quiroga, lugar no que se inspirou a escritora galega Emilia Pardo Bazán para a súa novela "Los Pazos de Ulloa".

Carballeira de Barcia, Catasós, Vilatuxe, Donramiro. Nestes lugares, os carballos dispostos uns pola man do home, outros polo azar da natureza, convértense en auténticas obras de arte; na de Barcia os carballos están plantados de tal forma que, se miren como se miren, forman liñas rectas e fan unha espesa sombra no verán.

Zobra e Serra do Candán. A parroquia de Zobra é a parte máis montanosa do Concello de Lalín, situada na Serra do Candán, que ocupa tamén o municipio de Silleda.